काठमाडौं । रवीन्द्र मिश्रले दलीय राजनीतिबाट तत्कालका लागि अलग हुने घोषणा गरेका छन्। उनले शनिबार प्रेस विज्ञप्ति जारी गर्दै राष्ट्रिय प्रजातन्त्र पार्टी (राप्रपा)का सबै जिम्मेवारीबाट राजीनामा दिएको जानकारी दिएका हुन्।
पार्टीका वरिष्ठ उपाध्यक्षसमेत रहेका मिश्रले देशभर राजसंस्था पुनर्स्थापनाको पक्षमा व्यापक जनमत हुँदाहुँदै पनि त्यसलाई संगठित र पूँजीकृत गर्न राप्रपा विभिन्न कारणले सफल हुन नसकेको बताएका छन्। उक्त विफलतामा आफू पनि जिम्मेवार रहेको उनले स्वीकार गरेका छन्।
मिश्रले देशको हितलाई विचारभन्दा माथि राख्नुपर्ने उल्लेख गर्दै बदलिँदो भूराजनीतिक अवस्था र कमजोर बन्दै गएको आन्तरिक परिस्थितिका बीच भावी पुस्ताका लागि देश बचाउन तथा निर्माण गर्न नयाँ समझदारी र संरचनागत पुनरावलोकन आवश्यक रहेको बताएका छन्।
विज्ञप्तिमा उनले आजदेखि लागू हुने गरी पार्टीका सम्पूर्ण जिम्मेवारीबाट राजीनामा दिएको र केही समयका लागि गैरदलीय (स्वतन्त्र) रूपमा आफ्ना विचार र अडान सार्वजनिक गर्दै जाने बताएका छन्। राजसंस्था पुनर्स्थापना र सुशासनजस्ता मुद्दामा भने आफ्नो अडान यथावत रहने उनको भनाइ छ।
गत नौ वर्षको आफ्नो राजनीतिक यात्रालाई उनले उतारचढावपूर्ण भएको उल्लेख गर्दै यस अवधिमा देश र राजनीतिक रूपान्तरणका लागि इमानदारीपूर्वक प्रयास गरेको बताए। तर ती प्रयास अझै पर्याप्त हुन नसकेको उनले स्वीकार गरेका छन्।
मिश्रले व्यक्तिगत स्वार्थभन्दा माथि देशको हितलाई राखेर राजनीति गर्ने प्रतिबद्धता दोहोर्याउँदै देश–विदेशमा रहेका नेपाली तथा पार्टीका नेता–कार्यकर्ताप्रति सहयोगका लागि आभार व्यक्त गरेका छन्।
2026 swatantrapath.com सर्वाधिकार सुरक्षित