यातायात भाडा ५ प्रतिशतले बढ्यो

काठमाडौँ । अन्तर प्रदेश सार्वजनिक यातायातका यात्रुवाहक तथा मालवाहक सवारी साधनको भाडादरमा ५ प्रतिशतले वृद्धि गरिएको छ।

इन्धनको मूल्यमा भएको उल्लेखनीय परिवर्तनलाई आधार मानेर वैज्ञानिक भाडा समायोजन प्रणालीअनुसार स्वतः लागू हुने व्यवस्थाबमोजिम भाडा समायोजन गरिएको यातायात व्यवस्था विभाग ले जनाएको छ। नयाँ भाडादर आजदेखि लागू भएको छ।

विभागका अनुसार, पछिल्लो पटक भाडा समायोजन गर्दा डिजेलको औसत बजार मूल्य प्रतिलिटर रु. १८०.८३ रहेकोमा हाल वैशाख ३ गतेसम्म आइपुग्दा प्रतिलिटर रु. ५५ ले वृद्धि भई औसत मूल्य रु. २३५.८३ पुगेको छ। यसले अघिल्लो समायोजनको समयको तुलनामा करिब ३०.४१ प्रतिशत वृद्धि देखिएको विभागको भनाइ छ।

इन्धन मूल्यमा भएको तीव्र वृद्धिका कारण सार्वजनिक यातायात सञ्चालन खर्चमा परेको असरलाई ध्यानमा राख्दै र सरोकारवालासँगको छलफलपछि भौतिक पूर्वाधार तथा यातायात मन्त्रालय को सैद्धान्तिक सहमतिअनुसार भाडा समायोजन गरिएको विभागले स्पष्ट पारेको छ।

विद्युतीय सवारी साधन बाहेक, दुई वा सोभन्दा बढी प्रदेशमा सञ्चालन हुने राष्ट्रियस्तरका रुटमा यात्रुवाहक बस तथा पहाडी र तराई मार्गमा सञ्चालन हुने मालवाहक सवारी साधनको भाडादर समान रूपमा ५ प्रतिशतले वृद्धि गरिएको छ।

यस प्रक्रियामा नेपाल ट्रक यातायात व्यवसायी महासंघ ले सक्रिय पहल गरेको बताइएको छ। महासंघका अध्यक्ष राजेन्द्र विक्रम बाँनिया ले इन्धन मूल्यमा आएको अस्वाभाविक वृद्धि र सञ्चालन खर्चको दबाबका कारण व्यवसाय धरापमा परेको अवस्थामा वैज्ञानिक प्रणालीअनुसार भाडा समायोजन हुनु आवश्यक रहेको बताएका छन्।

उनले सरकारसँग निरन्तर छलफल र पहलपछि मात्र यो निर्णय सम्भव भएको दाबी गरे। यातायात व्यवसायीहरूले भाडा समायोजनलाई समयानुकूल र आवश्यक कदमका रूपमा स्वागत गरेका छन्। यद्यपि, यात्रुहरूमा तत्काल पर्ने असरलाई ध्यानमा राख्दै दीर्घकालीन रूपमा इन्धन मूल्य स्थिरीकरण र यातायात नीतिमा सुधार आवश्यक रहेको धारणा व्यक्त गरिएको छ।

यससँगै अन्तर प्रदेश मार्गमा सञ्चालन हुने सार्वजनिक यातायात सेवाको नयाँ भाडा सूचीसमेत सार्वजनिक गरिएको विभागले जनाएको छ।

प्रतिक्रिया