विराटनगर । सुनसरीको देवानगन्ज गाउँपालिका–१ मा गोली प्रहारबाट एक युवक घाइते भएका छन्
गोली लागेर देवानगन्ज गाउँपालिका–१ का निरज यादव घाइते भएका हुन्। उनको तिघ्रामा गोली लागेको प्रहरीले जनाएको छ। घाइते यादवको विराटनगरस्थित नोबेल अस्पतालमा उपचार भइरहेको छ।
जिल्ला प्रहरी कार्यालय सुनसरीका प्रवक्ता डीएसपी चन्द्र खड्काले गोली प्रहार भएको पुष्टि गर्दै घटनाको विस्तृत विवरण आउन बाँकी रहेको बताए।
उनका अनुसार घटनास्थलमा प्रहरी परिचालन गरिएको छ। डीएसपी खड्काले आफू पनि घटनास्थलतर्फ जाँदै गरेको जानकारी दिए।
घटनामा संलग्न रहेको आरोपमा प्रहरीले दुई जनालाई पक्राउ गरेको छ। पक्राउ परेकाहरूको पहिचान भने प्रहरीले सार्वजनिक गरेको छैन।
यसअघि साउनमा देवानगन्जमा दुई समुदायबीच भएको झडप नियन्त्रणमा लिने क्रममा प्रहरीले गोली चलाउँदा तीन जनाको मृत्यु भएको थियो। देवानगन्ज घटनापछि मधेस प्रदेशका विभिन्न स्थानमा समेत हिंसा फैलिएको थियो।
2026 swatantrapath.com सर्वाधिकार सुरक्षित