काठमाडौँः दक्षिण कोरियाका लागि नेपाली राजदूतावासले तयार पारेको नेपालको पर्यटन प्रवर्द्धनसम्बन्धी प्रवद्र्धनात्मक भिडियो कोरियाको रेलमा प्रदर्शन गरिएको छ ।
सउल–बुसान रुटमा सञ्चालन हुने केटिएक्स हाइ स्पीड ट्रेन नं १०१ मा सो भिडियो प्रदर्शन गरिएको हो । यही फेब्रुअरी १ देखि प्रदर्शन भइरहेको उक्त १७ सेकेन्डको भिडियो ‘स्क्रिनिङ’का लागि दक्षिण कोरियाका लागि नेपाली राजदूत डा शिवमाया तुम्बाहाङ्फेले १४ अप्रिल २०२५ मा कोरेलका प्रमुख कार्यकारी अधिकृतसँगको भेटमा प्रस्ताव गरेकी थिइन ।
कोरेल र योनहाप समाचार एजेन्सीको सहयोगमा सन् २०२६ को फेब्रुअरीभरि कोरेलद्वारा सउल बुसान रुटमा सञ्चालन हुने उक्त रेलमा दिनमा कम्तीमा दुई पटक उक्त भिडियो निःशुल्क ‘इन ट्रेन स्क्रिनिङ’ गराउन राजदूतावास सफल भएको हो ।
भिडियोमा लुम्बिनी, सगरमाथा, चितवन राष्ट्रिय निकुञ्ज, स्वयम्भूनाथ र बौद्ध स्तूपाका साथै नेपाली कला र संस्कृतिका केही भिडियो क्लिप समावेश रहेको दूतावासले जनाएको छ ।
2026 swatantrapath.com सर्वाधिकार सुरक्षित