सूर्यग्रहणले ब्युँझाउँदैछ स्पेनको सुनसान गाउँ, जहाँ एक रातका लागि दोब्बर हुनेछ जनसंख्या

काठमाडौं। स्पेनको उत्तरी बुर्गोस प्रान्तमा रहेको अभेलानोसा डे मुनो गाउँ अहिले विश्वभरका खगोलप्रेमीको ध्यानको केन्द्र बनेको छ। सामान्य अवस्थामा करिब १० जना मात्रै स्थायी रूपमा बसोबास गर्ने यो गाउँ आगामी १२ अगस्टमा दुर्लभ पूर्ण सूर्यग्रहणका कारण एक रातका लागि असाधारण रूपमा चहलपहल हुने भएको छ।

१२ अगस्ट २०२६ मा देखिने पूर्ण सूर्यग्रहणको सूर्य पूर्ण रूपमा ढाकिने क्षेत्र अर्थात् ‘टोटालिटी’ अभेलानोसा डे मुनोमाथिबाट गुज्रिनेछ। खुला क्षितिज, न्यून कृत्रिम प्रकाश, कम भीडभाड र पश्चिमतर्फ फैलिएका सुनौला गहुँबारीका कारण यो गाउँ सूर्यग्रहण अवलोकनका लागि उपयुक्त स्थान मानिएको छ।

सन् १९९९ पछि मुख्य युरोपबाट देखिने यो पहिलो पूर्ण सूर्यग्रहण हुने बताइएको छ। मुख्य स्पेनबाट भने सन् १९१२ यता पहिलोपटक यस्तो दृश्य देखिने भएकाले यसप्रति विशेष चासो बढेको हो।

ग्रहण सूर्यास्तअघि हुने भएकाले केही मिनेटको अवधिमा दिनमै दुईपटक साँझ परेजस्तो देखिने दुर्लभ दृश्य देख्न सकिने वैज्ञानिकहरूको भनाइ छ। त्यही रात आकाशमा पर्सिड्स उल्कावर्षासमेत देखिने भएकाले यो दिन विशेष खगोलीय घटनाको संगम बन्नेछ।

गाउँमा लामो समयदेखि बस्दै आएकी सारा अल्भारेज रोड्रिगेजले आफ्नो जीवनकालमा गाउँको ठूलो परिवर्तन देखेकी छन्। कुनै समय करिब २०० जनाको बसोबास रहेको अभेलानोसा डे मुनो अहिले लगभग खालीजस्तै बनेको छ।

खेतीमा यान्त्रिकीकरण बढ्दै गएपछि रोजगारीको खोजीमा धेरै स्थानीय बासिन्दा मड्रिड, बार्सिलोना र बिल्बाओजस्ता सहरतर्फ बसाइँ सरे। तर सूर्यग्रहणले भने वर्षौंदेखि सुनसान बनेको गाउँमा पुराना बासिन्दालाई पुनः फर्काउने भएको छ।

पूर्वस्थानीय राउल ग्रान्दे रेविला परिवार, छोराछोरी, नातिनातिना तथा साथीभाइसँगै गाउँ फर्किने तयारीमा छन्। उनका परिवारबाट मात्रै करिब २० जना गाउँ पुग्नेछन्। यसले एक रातका लागि गाउँको जनसंख्या दोब्बर बनाउनेछ। अन्य स्थानीयले पनि स्पेन, बेलायत, फ्रान्स र भेनेजुएलाबाट आउने आफन्त तथा साथीहरूको स्वागत गर्ने तयारी गरेका छन्।

ग्रहणको प्रभाव अभेलानोसा डे मुनोमा मात्रै सीमित छैन। आसपासका होटलहरू लामो समयअघि नै भरिइसकेका छन्। नजिकैको ऐतिहासिक प्याराडोर डे लेर्मा होटलका सबै कोठा सन् २०२२ मै बुक भइसकेका थिए।

पर्यटन अधिकारीहरूका अनुसार पूर्ण सूर्यग्रहण अवलोकनका लागि उपयुक्त स्थान खोज्दै आउने मानिसका कारण यस क्षेत्रका अधिकांश आवास भरिएका छन्।

ग्रहणका बेला सूर्य क्षितिजभन्दा निकै तल रहने भएकाले गाउँ वरपरका गुफा र अग्ला स्थानहरू अवलोकनका लागि विशेष उपयुक्त मानिएका छन्। स्थानीयका लागि यी गुफा केवल सूर्यग्रहण हेर्ने स्थान मात्र नभई पुस्तौंदेखि सूर्यास्त अवलोकन गर्दै आएको भावनात्मक महत्व बोकेका ठाउँसमेत हुन्।

ग्रहणको दिन अभेलानोसा डे मुनोमा परिवारको भेटघाट, बालबालिकाको हाँसो र मानिसहरूको चहलपहलले वर्षौंदेखिको सुनसानपन तोड्नेछ। त्यसपछि केही मिनेटका लागि दिउँसै अन्धकार छाउनेछ।

सामान्यतया विश्वको ध्यानबाट टाढा रहने यो सानो स्पेनी गाउँ भने त्यही केही मिनेटका लागि संसारकै केन्द्रमा परिणत हुनेछ।

प्रतिक्रिया