काठमाडौं । नेकपा एमालेले पार्टी अध्यक्ष केपी शर्मा ओलीको पक्राउको विरोधमा देशव्यापी आन्दोलन कार्यक्रम घोषणा गरेको छ।
आज पार्टी कार्यालय च्यासलमा बसेको सचिवालय बैठकले अध्यक्ष ओली तथा पूर्वगृहमन्त्री रमेश लेखकको गिरफ्तारीलाई प्रतिशोधपूर्ण र बदला–प्रेरित भन्दै त्यसको विरोधमा आन्दोलन थप सशक्त बनाउने निर्णय गरेको हो।
महासचिव शंकर पोखरेलका अनुसार शान्तिपूर्ण आन्दोलनमाथि सरकारले प्रहरीमार्फत दमन गरेको आरोप लगाउँदै त्यसविरुद्ध चरणबद्ध आन्दोलनका कार्यक्रम सार्वजनिक गरिएको छ। पार्टीले वैशाख १२ गतेसम्म विभिन्न विरोध कार्यक्रम सञ्चालन गर्ने जनाएको छ।
ओली पक्राउको विरोधमा एमालेले तय गरेको कार्यक्रम :
१- चैत २५ गतेसम्म जिल्ला तहमा आन्दोलनकेन्द्रित बृहत भेला गर्ने।
२- चैत २८ गते सबै पालिकामा विरोध प्रदर्शन गर्ने।
३- वैशाख ३ गते वडा तहमा भेला गर्ने।
४- वैशाख ७ गते प्रदेश राजधानीहरूमा प्रदर्शन गर्ने।
५- वैशाख १२ गते राजधानीमा विशाल विरोध प्रदर्शन गर्ने।
६- सरकारद्वारा विद्यार्थी तथा पेशागत संगठनहरूसम्बन्धी गरिएका गतिविधिहरूका विषयसमेत समेटेर सबै जनसंगठनहरूले आ-आफ्नो ढंगले आन्दोलनका कार्यक्रम सञ्चालन गर्दै पार्टीद्वारा घोषित आन्दोलनलाई प्रभावकारी बनाउन सहयोग गर्ने। साथै, भोलि ११ बजे जनसंगठन संयन्त्रको बैठक पार्टी कार्यालयमा बस्ने।
७- सर्वपक्षीय नागरिक संवादका लागि उपाध्यक्ष रघुजी पन्त, उपमहासचिव योगेश भट्टराई र केन्द्रीय सदस्य मीन बहादुर शाही लाई जिम्मेवारी दिइयो।
८- संसदभित्र दलहरूसँग सहकार्य र प्रभावकारी प्रस्तुति गर्ने जिम्मेवारी उपाध्यक्ष राम बहादुर थापा बादल र सचिव पद्मा अर्याल लाई दिइयो। साथै, भोलि ३ बजे संसदीय दलको बैठक पार्टी कार्यालयमा बस्ने।
९- आन्दोलनका थप कार्यक्रम तय गर्न तत्कालै पार्टी केन्द्रीय कमिटीको बैठक बोलाउने निर्णय गरिएको छ।
2026 swatantrapath.com सर्वाधिकार सुरक्षित